اللاه سنین کؤمه یین اولسون!

بعضی آنلار من اؤزوم بو آنا دیلینده بعضی جومله لره حال، حیران قالمیشام . بیر

میثاللا بونو ایستیرم بیان ائدم . "آللاه سنین کؤمه یین اولسون!"

آللاه سنین کؤمه یین اولسون! من اؤزوم بیر چؤره کچی یم. اورادا ، اوندان هم گؤزل

همده اوجوز چؤره یی یاپیب خالقین الینه وئریرم. بیردن گؤردون بیر قوجا توکذ ننه ، 

یا بیر آیری یئره گئتمه ین ، قونشو اسمر خالا گلیب چؤرک آلاندا، یادا بیردن گؤردون

زینت خانباجی نی نوبه سیز یولا سالاندا ، چوره یی آپارا - آپارا دوداق آلتی دئییر:

ایسکندر ، آللاه سنین کؤمه یین اولسون ! آللاه سنین کؤمه یین اولسون!

ایندی بو طرفینه باخ؛ سانکی رشیدین ، ایرضانین نوبه سی اولاندادا چوره یین

وئرمه یه سن! یادا سعیدین چؤره یین قاش - قاباغینان وئریب، اونو یولا سالاسان؛

یادا اوسته لیک آخیردا بیری ایله، حتتا حسینقلوایله ساواشیب جاوادینان قارقا

بوغوشدوروب، قاب - باجانی توکاندا بیر بیرینه ووراسان. او آدام چوره یی گؤتوروب

گئدنده دئییر: ایسکندر، آللاه سنین کؤمه یین اولسون!

آللاه سنین کؤمه یین اولسون!

بو دورومدا یورغون - آرغین توز-توفانلی قاپینی باغلاییب ائوه گئدنده ، ایسته ییرسن

بیر جومله آغزیندان قوپسون کی من چؤرکچی خانانی قورتاریب گلمیشم؛ سیز

هله یورقان - دوشه یی یغیشدیریب یئرینه قویمامیسیز، ائوده کی منه تس - تس

گؤزآلتی باخیب دئییر : ایسکندر ،آللاه سنین کؤمه یین اولسون !

آللاه سنین کؤمه یین اولسون !

چوخ یئرلرده بو جومله نی منه ساری ایشله دیرلر؛ بعضی واختلار ، معناسین

بیله - بیله، بعضی زامانلار معناسین بیلمه یه - بیلمه یه بو جومله نی منیم

قارشیما آتیرلار .

آما بو جومله نی بیر یئرده آیری جوره ایشله دیب منه چوخلو احتیرام قاییل

اولورلار، او زامان کی بو جومله نی اؤزونه ساری گؤتورور. اودا او زاماندی کی

رشیده تیلفون ائیله ییب،اؤز شعیرلریمدن بیرین اوخویورام، رشید یاواشجاسینا

یانیندا اوتوران دوستو چنگی معللیمه دئییر: زنگ ووران ایسکندردی ایسته ییر

اؤز شعیرلریندن بیرین اوخوسون . آللاه بیزیم کؤمه ییمیز اولسون!

آللاه بیزیم کؤمه ییمیز اولسون!!

گرگرلی آراز